APOCALIPSIS 8
Mam de Todos Santos Chuchumatán
Tej tel tiiˈn twuukan ẍipbelte bix tej tlonte Juan juntl tsanjel Dios kˈiˈn jun tcublel incienso tuˈn
8 Tejtzen tel tiiˈn Jtal Carnel twuukan ẍipbelte, yutˈl cykilca tuj cyaˈj niyˈjan hora. 2 Bix e wila kej wuuk tsanjel Dios tuj cyaˈj waˈlke twitz Dios. E xiˈ kˈoˈn wuuk xux cye. 3 Bix ul juntl tsanjel Dios tuj cyaˈj, bix e cub weˈ twitz altar, kˈiˈn jun tcublel incienso tuˈn. Nim incienso e xiˈ kˈoˈn te, tuˈntzen toc te tmoj cynaˈj Dios cykilca ocslal, tuˈn t‑xiˈ toyet twiˈ altar te oro tcub twitz tkˈukbil Dios. 4 Bix tuj tkˈab ángel e jaw tsibel incienso, junx tuyaj cynaˈj Dios ocslal, bix e pon twitz Dios. 5 E jawtzen tiiˈn ángel tcublel incienso, bix e cuˈx tnojsaˈn tuya kˈakˈ tcub twiˈ altar, bix e cuˈtz t‑xooˈn twitz txˈotxˈ. Ntzajtltzen kˈancyok nrumumun tuyax nim s̈itz̈ˈ tuyax tken kˈancyok bix tuyax jun xcyaklajnab.
Kej wuuk xux
6 Entonces, kej wuuk tsanjel Dios tuj cyaˈj kˈiˈn wuuk xux cyuˈn, e bint cyten tuˈn toc cyxuxen. 7 Tej toc t‑xuxen tneel ángel, e tzaj skbaken tuyax kˈakˈ cysmoˈn cyiib tuya tz̈iyˈ. Bix e cuˈtz t‑xooˈn twitz txˈotxˈ, bix e baj tzˈeyˈ toxen paˈ twitz txˈotxˈ bix toxen paˈ tzeeˈ bix cykilca chaˈx cˈul e baj tzˈeyˈ.
8 Tejtzen toc t‑xuxen tcab ángel, e wila jun ma tij kˈakˈ, tisencˈa jun ma tij witz, e cuˈtz xooˈn tuj mar. Bix toxen paˈ mar oc te tz̈iyˈ. 9 Bix e cyim toxen paˈ jil eteˈ tuj mar, bix toxen paˈ barc e baj.
10 Tejtzen toc t‑xuxen toxen ángel, e tzaj tzˈak jun ma tij cheˈw tuj cyaˈj. Njululun tisen jun tzaj, bix e tzaj tzˈak cyibaj toxen paˈ nimaˈ bix cyibaj twiˈ aˈ. 11 Jatzen tbi cheˈw Cˈa Itzaaj. Toxen paˈ aˈ twitz txˈotxˈ oc puro cˈa. Nim xjal e cyim tuˈn tlaj aˈ otk tzˈoc te cˈa.
12 Tejtzen toc t‑xuxen tcyaaˈn ángel, oc qˈuixbisaˈn jtoxen paˈ kˈij tuyax toxen paˈ xjaw tuyax toxen paˈ cheˈw. Juˈ tzunj, e cubxsen klolj toxen paˈ cywitz, tuˈn miˈn ten spiˈyenal cyaja hora te kˈij, bix juˈx toxen paˈ koniyan.
13 Bix e wila jun ikel eyˈ npurpan twitz cyaˈj tuj lugar mas jawnex. Bix e xiˈ tkbaˈn tuya tkˈajkˈajel tyol cyiwxix:
―¡Ayxsen, ayxsen, ayxsen cyej xjal najl twitz txˈotxˈ! cuma chˈixcˈa cyoc xuxet oxet xux cyuˈn oxetl ángel―tz̈itzen ikel eyˈ.
Copyright © 2000 by Wycliffe Bible Translators International